India-a Afghanistan embassy khar a ni dawn

India-a Afghanistan embassy chu khar a ni dawn tih Afghan embassy chuan Ministry of External Affairs (MEA) hnenah a hriattir niin sorkar laipui chuan a sawi. MEA-in Afghan embassy aṭanga sign loh lehkha a dawn, Note Verbale-ah chuan September thla tawpah chuan an embassy khar a nih tur thu an sawi a ni.

Lehkhaa a inziah danin embassy hian India sorkar hnenah ngenna eng emaw zat a lo siam tawh a, ṭanpuina bakah Afghanistan aṭanga India-a lehkha zir tum zirlai 3,000 te visa siamsak turin a ngen a, mahse, India sorkar hian heng ngenna hi engmah a tihlawhtlinsak lo a ni. Hei bakah hian Taliban-te'n rorelna an chan hnuah ngaihsak an hlawh loh thu leh, India sorkar chuan a ṭanpui ṭhat tawk bawk si loh avangin an embassy chu khar mai a ngaih tur thu an sawi. India-in June 2022-a Kabul mission a kalpui pawh khan Islamic Republic of Afghanistan hnuaia awm Afghan embassy chu ngaihven leh pawm an nihna lantir an ni lo tiin a sawi bawk.

Afghanistan embassy aṭanga an lehkha dawnah hian ambassador chuan Afghanistan embassy chunga Afghanistan flag zar chu la thla lo tura ngenin, hei hian Taliban sorkar-in a paihthlak hmaa Afghanistan mipui sorkar ta a nihna a lantir dawn a ni, a ti.

Afghanistan embassy-ah hian Ambassador Farid Mamundzy chu a hotu ber niin, tunah hian London-ah a awm mek a ni. Mamundzy bakah embassy-a a thawhpui tam zawkte chu khawthlang ram, US leh Canada bakah Australia-ahte sahimna pek niin an cheng chhunzawm tawh a ni.