Kolkata-ah drone-in damdawi leh nitin mamawh deliver tum

Kolkata-a New Town area thuneitute chuan Delhi-a inbun logistic provider-te nen ṭangkawpin damdawi bakah nitin mamawh thil leh ei turte drone hmanga pek theih tura ruahmanna siam mek a nih thu leh, tun aṭanga thla hnih emaw thla thum hnuah chuan an kalpui theih an beisei thu an sawi.

Delhi logistic company hi Skye Air Mobility Pvt. Ltd. niin, an vice president, Capt. Eshaan Khullar chuan New Town area-a housing society 12 bawr vel nen inremna an neih tawh thu sawiin, drone service hian nitin mamawh leina atana hun hman a tihtlem theih an beisei thu a sawi.

Drone-te hi Ministry of Civil Aviation leh mawhphurtu agency dangte phalna neia hman tur an ni a, Skye Air Mobility Pvt. Ltd. chuan an drone-te chu bungrua gm 500 aṭanga kg 50 thleng deliver thei tura an duan thu an sawi. Drone delivery duhte chuan tihdan phung pangngaia online shopping site, company nena inremna nei hnen aṭanga chah mai tur a ni. Skye Air Mobility Pvt. Ltd. chuan khawvela damdawi deliver hla ber (Beyond Visual Line of Sight - BVLOS) chu Flipkart Health hmangin, km 104 zeta hlaah an lo tih tawh thu leh, hei hian hun paih nasa lutuk tur a ven hle thu an sawi.