Delhi-a boruak bawlhhlawh tihrehna tur duang

Delhi chief minister Arvind Kejriwal chuan nimin khan Delhi-a boruak bawlhhlawh lutuk tireh tura hmalakna an duan, 'Winter Action Plan' chu a tlangzarh. Kejriwal chuan Winter Action Plan-ah chuan hmalakna tur ruahmanna 15 a awm thu sawiin, Delhi-a boruak bawlhhlawhna hmun zualpui 13 an thlan thu leh, chung hmunahte chuan ngawrh zawka kalpui an nih tur thu a sawi.

Kejriwal chuan boruaka lei nawi tireh turin smog gun leh tui phuhna hman a nih tur thu leh, motor tlan tamna kawngpui 90 velah chuan tihdan dang an zawn tur thu a sawi bawk. Motor pollution certificate check tur leh motor upa tawh lutukte vai tur team 385 siamin, khap a nih anga khawlaia bawlhhlawh halte veng tura team 611 siam a nih thu a sawi. "Delhi mipui zawng zawngte hian Green Delhi app. download vek ula, boruak tichhe thei thil reng reng chu a kaihhnawih department-ah report zel ang che u. Thuneitu leh hma latute pawhin khauh takin ruahmanna kan siamte kalpui ula, Winter Action Plan-a kan tarlan point 15 te tihlawhting turin ṭang ang che u," tiin thu a chah.

Delhi-ah hian kum tinin sorkar hian thlasik laia hman leh kalpui tur ruahmanna hrang hrang leh hmalakna a nei ṭhin. Kejriwal chuan sorkar hmalakna hnuaiah Delhi-a boruak chhe lutuk ṭhin chu a ziaawm chho ve zel niin a sawi.