President-in Women's Reservation Bill pawm

President Droupadi Murmu chuan nimin khan Women's Reservation Bill chu pawmin a hming a ziah hnan a, law-ah chantir a ni ta.

Law Ministry chuan thuchhuah siamin President-in bill a pawm thu leh, official-in Constitution (106th Amendment) Act tia sawi a ni tawh dawn tih a tarlang.

Women's Reservation Bill hi constitution amendment bill 128-na niin, September 18- 22, 2023 chhunga Parliament special session neih zawh takah khan pass a ni. Lok Sabha-ah member kal 456 aṭangin vote 454 a hmu a, Rajya Sabha-ah chuan member kal zawng zawng 214-in bill duh zawngin an phar vek thung. Women's Reservation Bill-in a tum ber chu Lok Sabha, State legislative assembly leh Delhi legislative assembly-ah hmeichhe tan seat 33% dah a ni a, mahse, dan anga hman ṭan a nih hun tur erawh sawi lawk theih a ni lo thung.

Union home minister Amit Shah chuan Lok Sabha-a pass a nih khan, he bill hi census neih a nih hma leh, delimitation neih a ni hma chuan hman nghal a rem loh thu sawiin, kum 2029 hnu lamah hman a ni thei dawn chauh niin a sawi.