India leh China-in Corps Commander level inbiakna nei dawn
Ram pahnih aiawhte hian eastern Ladakh sector-ah inbiakna hi an nei dawn a, hei hi round pasarihna tur ni tawhin ram pahnih sipaite inepna chungchangah an inbe leh dawn tih official pawimawh tak pakhatin a sawi niin Hindustan Times chuan nimin khan an tarlang.
Sipai inepna chungchangah hian September 21 khan inbiakna hnuhnung ber an nei a, hetah hian thutlukna pawimawh siam an nei lo a, India aiawhte chuan flashpoint zawng zawngah inhnukdawk turin China chu phutin buaina tihziaawmna tura kawng awmchhun chu 'status quo' kalpui leh a nih thu an sawi. China lam chuan Pangong Tso southern bank lama India sipai awmte chu lachhuak turin India lam chu an ti ve thung.
Beijing leh Delhi chuan September 22 khan thuchhuah inṭawm siam nghalin front line-a sipai thawn belh tawh lo turin inremna an siam tih an tarlang a, inbiakna neih leh thuai an remti a ni.
Inbiakna an neih round paruknaah khan Lieutenant General Harinder Singh leh Lieutenant General PGK Menon-te chuan India sipai ai an awh a, thlaleh lamah hi chuan Leh-based 14 Corps commander dinhmun hi Menon hian Singh hnen aṭang hian a lachhawng dawn nia sawi a ni bawk.
Ladakh khawchhak lama Line of Actual Control (LAC)-a India leh China sipaite inep mek chung changah hian ram pahnih sipai aiawhte hian inbiakna an nei fo tawh a, heti chung hian ram pahnih sipaite hian an defence an thuam chak zel a ni. Kar hmasa tir lamah khan India sipaite chuan Chumar, Depsang and Chushul sector-ahte T-90 leh T-72 tank an la dah belh leh a ni.