J&K Governor-in thutlukna siam turin hriattir

Jammu and Kashmir Governor NN Vohra chuan Peoples Democratic Party (PDP) leh Bharatiya Janata Party (BJP) hruaitute hnenah lehkha thawnin, J&K-a sorkar siam tur chungchangah thutlukna chu vawiin tlaiah siamfel turin a hriattir.

J&K chief minister hlui Mufti Mohd Sayeed a thih hnu kar thum hnuah pawh amah thlaktu tura beisei a fanu, PDP hotu Mehbooba Mufti chuan tun thlengin BJP nen ṭangrual sorkar an siam chhunzawm dawn leh dawn loh a la sawi thei lo a ni.

PDP chuan CM hlui Sayeed-a hoa BJP nena thawhdunna thuthlung an lo siam tawhte chu BJP lamin ziaka nemngheh an remtih loh chuan thawhpui chhunzawm zel an duh dawn lo niin an sawi.

Pathianni khan Mehbooba-i hian an party hotute chu meeting a neihpui a, sorkar thar siam dan tur an sawiho. PDP chuan CM hlui Sayeed-a hmathlir leh hmalakna hrang hrangte kalpui chhunzawm zel a nih dawn chuan sorkar thar siam hi a remti dawn a ni.

BJP state general secretary (organistation) Ashok Koul chuan Govenror Vohra chu zanin dar 6 hian an hmu dawn tih a sawi a, PDP hruaitute pawhin vawiin vek tlai dar 4.30 ah Governor hi an hmu bawk ang.

BJP state president Sat Sharma chuan Governor an hmuh hma hian member pathum awmna party core group chuan Delhi-a BJP high command chu biain, thil awmdan te an sawipui phawt tur thu a sawi. "Party high command thutlukna siam ang chu Govenor hnenah hian kan hriattir dawn a ni" a ti.