Delhi Police-ten activist-te kut an thlak

Hyderabad-a zirlai intihlum, Rohith Vemula tana rorelna dik phutin kar kalta Inrinni khan activist-ten Delhi khawpuiah kawng an zawh a, kawngzawhte hi police-te chuan na takin kut an thlak.

Lungawi lohna lantira kawngzawhte hi central Delhi-a Jhandewalan-a RSS office pawn lamah an pungkhawm a, Rohith Vemula tana rorelna dik thlentir an duh thu an au laiin police leh mi tu tih hriat lohte chuan an tiang nen na takin pungkhawmte hi kut an thlak zui ta a ni.

Kawngzawhnaa tel pakhat chuan, "Kawngpui an lo dang a, polic-te chuan kawng dang zawh turin min lo hrilh a ni. Mahse hetihlai hian khawi lam mi nge tih hriat lohte rawn langin, rawng takin kut min rawn thlak zui ta a ni" a ti. Police leh midang kawngzawhte kut an thlak lai video hi social media lamah thehdarh a ni bawk.

Hyderabad Central University-ah chuan Rohith Vemula tana rorelna dik phutin zirlai pathumten January 29
aṭang khan tiam chin awmloin chaw an la nghei chhunzawm zel. Nimin khan chaw nghei zinga pakhat chu a chauh avangin university health centre-ah hruai a ni.

Rohith Vemula intihlumnaah hian university hotu leh union minister pahnih chuan mawhphurhna an nei nia sawiin, an ban phutin zirlaiten nawrh an huaihawt a ni. Hei vang hian ni 12 zet chu university hi khar a ni a, nimin khan an hawng ṭan leh.