Bawng talha puh BJP hruaitu lakah NSA Act hmang

Madhya Pradesh-a BJP hruaitu hlui pakhat, bawng talha puh chu National Security Act (NSA) hnuaiah thubuai siamsak a ni. He Act hi ram himna tiderthawng thei nia ngaihte laka hman ṭhin a ni.

Dewas district, Madhya Pradesh-a Tonkkurd Manda-a BJP minority cell vice president hlui, Anwar Mev chu January 27 khan an inah bawngsa nia hriat hmuh a nh avangin bawng talhru-ah puhin man a ni. A thurualpui nia puh midang pakuate pawh man an ni bawk.

Anwar leh midang pakuate hi Ujjain central jail-ah dah an ni a, IPC leh Madhya Pradesh Cow Slaughter Ban Act hnuaiah criminal case siamsak an ni. Hemi hnu hian district thuneitute chuan Anwar-a dan bawhchhiat tawh dan record-te enin, NSA hi an hmang zui leh ta niin BJP hruaitu Shailessh Kesarwani chuan a sawi. Kesarwani chun an state chhungah bawng talh chu englai maha an ngaihthiam loh tur thu a sawi.

Anwar leh a chhungte chuan an ina sa an hmuh hi bawngsa ni loin, lawi sa niin an sawi thung a, Mathura-a laboratory-ah enfiah tura lak a ni.

Police-te chuan Anwar Mev hian sa talh phalna a nei ṭhin a, mahse a license hi a nung tawh lo niin an sawi. A chenna inah hian sa fun bawm 10 hmuh a ni a, heng zinga bawm 3-ah chuan bawng sa a awm niin an sawi bawk. Mahse, hei hi forensic test neih mek a nih avangin a dik ngei em tih hriat chian a la ni lo.