AP-ah nawrh huaihawtten rel an hal

Andhra Pradesh-a Kapu hnam chuan Backward Class category-a dah phutin nawrh an huaihawt a, Pathianni khan East Godavari district-a Tuni khuaah rel an hal. State chhung hmun dangah pawh tharum thawhna a thleng bawk.

Kapu hnam nawrh huaihawtte hian rel pindan pali bakah police station pahnih leh motor 25 an hal a, an innawr buainaah police 15 leh railway-a thawk mi pali-in hliam an tuar.

Andhra Pradesh Chief Minister Chandrababu Naidu chuan Pathianni zan khan Kapu hnam thil phut hi pek a remtih thu a sawi. CM chuan, "Sorkar chuan Kapu hnam tana reservation siamsak hi a duh a, hemi lo buaipui tur hian Judicial Commission pawh din a ni" a ti. Nawrh huaihawt≠na hmun hrang hranga tharum thawhna thlengte pawh enfiah a nih tur thu leh, pawikhawihtute chu hrem an nih tur thu a sawi.

Kapu hnam hruaitu, minister hlui M Padmanabham chuan nimin aṭang khan kawngpui an dante chu an tihtawp thu a sawi a, hemi rual hian state sorkar chu backward classes list ti≠chhuak a, Kapu hnam telh turin a phut. Backward class category-a telh an nih chuan Kapu hnam hian zirna leh sorkar hna laknaah chanpual an nei thei dawn a ni.

State sorkarin an thil phutte a tihhlawhtlin loh chuan nasa zawka nawrh huaihawt an chhunzawm leh tur thu Padmanabham chuan a sawi bawk.

Tuni khuaa tharum thawhna thleng avang hian nimin khan venhim hna thawk turin police leh paramilitary force tam zawk tirh luh nghal an ni. Police-te chuan East Godavari district chhungah mi pali aia tam punkhawm a khap nghal a ni.