UP CM-in pawngsual thubuai kalzelah police 5 a suspend

Utter Pradesh chief minister Yogi Adityanath chuan nimin khan an state-a dalit hmeichhia kum 19 mi pawngsual rawn thubuai kal zelah Hathras-a police panga a suspend.

He hmeichhia pawngsual thubuai chhuitu Special Investigation Team (SIT) chuan an preliminary report chu UP sorkarah an theh lut a, sorkarin uluk taka a ngaihtuah hnuah heng police te hi suspend an ni zui ta a ni.

Police suspend zingah hian Hathras SP Vikrant Vir pawh a tel a, ani hi he thubuai chhui chungchanga inthlahdahah a puh a. Circle Officer Ram Shabd, Inspector Dinesh Meena, Sub Inspector Jagveer Singh leh head constable Mahesh pal te chu suspend an ni bawk. Yogi chuan pawngsual thubuai hi nimin vek khan CBI chhui chian tir turin a ti.

CM Yogi chuan hmeichhe zahawmna tibawrhbangtu chu an phu tawk hremna pek zel a nih tur thu a sawi a, "Nu leh kan farnu te zahawmna kan zah sak tur a ni a, kan state-ah hian hmeichhiate zahawmna humhimna kawngah sorkar chuan theihtawpin hma a la a ni," a ti.

Kumin September 14 khan, UP-a Hathras khuaah kum 19 mi dalit hmeichhia chu loah ran chaw la tura a kal chu upper caste mipa paliin rawng takin an pawngsual rawn a, an pawngsualna lamah hian a spinal cord an tih chhiatsak bakah a taksa hmun hrang hrangah hian hliam na tak a tuar. A hliam te hi a nat em avangin Delhi-a Safdurjung hospital-ah enkawl a ni a, Delhi-a enkawl a nih hma hian ni 15 chhung chu UP-a Aligarh khuaa Jawaharlal Nehru Medical College and Hospital-ah enkawl a ni. Kar hnih chhung damdawi-ina enkawl a nih hnuah a hliam tuar loin September 29 khan a boral zui ta a ni.

Pawngsualtua puh mi pali Sandip, Ramu, Lavkush leh Ravi-te chu Hathras police-te chuan an man tawh a, attempt to murder, attempt to killing leh Scheduled Caste and Scheduled Tribe (Prevention of Atrocities) Act, 1989 hnuaiah heng mi palite hi thubuai siamsak an ni. Pawngsual tawktu unaupa erawh chuan a farnu pawngsualtu te hi ni 10 chhung chu man loa an awm thu a sawi.

UP sorkar chuan pawngsual tawktu chhungte hnenah hian zangnadawmna cheng nuai 5 a pek tur thu a sawi bakah, State Urban Development Agency (SUDA) scheme kaltlangin Hathras khuaah an chhungkaw tan in pek a ni dawn a, an chhungkaw member pakhat chu assistant junior hna pek a ni bawk ang.