PM Modi-a'n 'Swachhata Hi Seva' hmang

Mann Ki Baat hnuhnung bera prime minister Narendra Modi-a'n rawtna a siam angin, nimin khan Mahatma Gandhi pian cham puala faina beihpuithlakna, 'Swachhata Hi Seva' chu hman a ni. India ram hmun hrang hranga politician-te chuan 'Shramdaan' (mahni duhthlannaa hnathawh) kalpuiin, khawlai phiah fai hna an thawk hlawm a ni.

PM Modi chuan faina leh hriselna chu a inzawm tlat thu sawiin,"Vawiina ram pumin faina lam kan hawi laiin kei leh Ankit Baiyanpuriya pawhin chutiang chu kan ti ve a ni. Faina piah lamah hian hriselna leh taksa ṭhatna a awm a ni. Vawiin chu India fainain min phuar vel a ni," tiin, wrestler Ankit Baiyanpuriya nena hmun an phiat lai X-ah a post.

Union Housing and Urban Affairs Ministry thuchhuah chuan faina beihpuithlak atan hian ram chhunga hmun nuai kua chuang thlan a ni tih a tarlang.

Nimina Swachhata Hi Seva hmannaah hian union home minister Amit Shah leh Gujarat chief minister Bhupendra Patel-te chuan Ahmedabad-a hnatlanna an hmanpui a, BJP president JP Nadda pawhin Delhi-a Jhandewalan hmuna hnatlang a zawm bawk. Anni bakah hian Uttar Pradesh chief minister,Yogi Adityanath, union power minister RK Singh, union minister Anurag Thakur leh Indian Air Force chief Air Chief Marshal, VR Chaudhari te pawhin hmun hrang hrangah faina hna thawkin hun an hmang ve bawk. Delhi Municipal Corporation chuan Swachhata Hi Seva pual hian Delhi-a hmun 500-ah faina hna thawh a nih thu sawiin, Uttar Pradesh-ah hmun nuai khat aia tam leh Maharashtra-ah beach leh college bakah hmun dang 62,000 chuang tihfai a nih thu an sawi bawk.