Haryana Congress MLA leh a fate 2 manna thupek tichhuak

Gurugram, Haryana-a special Prevention of Money Laundering Act court chuan pawisa chheprelh leh bank guarantor lem hmanga in sakna tur project an lo lak avangin Haryana-a Congress MLA ni lai, Dharam Singh Chhokar leh a fate pahnih manna tur a ti chhuak. Chhokar leh a fate pahnih hi court chuan bail theih loh tiin man an nihna tur order a tichhuak.

Congress MLA laka thubuai theh luttu, Enforcement Directorate (ED) chuan 2021 khan Sushant Lok police station-ah Sai Aina Farm Private Limited lakah thubuai theh luh a ni a ti. He company hian chenna in tur eng emaw zat sakna tur license hmuhna atan bank guarantee lem an hmang nia hriat niin, he thubuai an chhuinaah hian tuna a bul tumtu nia puh mekte hming hi a lo lang chhuak niin an sawi. Rajendra Park police station-ah pawh Sai Aina Farm Private Limited lakah hian thubuai theh luh a ni bawk niin ED-te chuan an sawi.

ED-te hian August 16 khan special court-ah thubuai hi kalpuiin, bail theih loha manna thupek chhuah turin an ngen. ED chuan thubuai an chhui lai hian Dharam Singh Chhokar hnen aṭang hian document an man thu leh, company offcie an dapnaah pawh dan phal loh thil tam tak an hmuh chhuah thu an sawi. Sai Aina Farm Private Limited hian ram acre 10-a zauah in 1,500 vel an sak a ngai a, in leitu turte hnen aṭanga Rs. vbc 360 khawn chhuakin in erawh an sa zo lo a, an pawisa khawnte hi company-a director-te chuan mimalin an insem zo nia hriat a ni.