NMC dan siam tharah India chhim lam state-te lungawi lo

National Medical Council (NMC) chuan medical institution-a seat awmte chu state emaw UT emawa mihring cheng zat a zira siam rem tur tiin thutlukna a siam a, hei hi India chhim lam state, a bikin Karnataka, Tamil Nadu, Andhra Padesh, Kerala, Telangana leh Puducherry te chuan an duh lo a, a tiṭhate hremna a nih theih thu an sawi.

NMC hian thla hmasa khan he dan thar hi a tichhuak a, sorkar leh mimal medical college zawng zawngte a huam tur thu sawiin, academic session thar aṭanga hman ṭan tur a nih thu an sawi. "Kum 2024-2025 academic session aṭang chuan medical college thar din tura phalna dilte aṭangin kum khata 50/100/150 seat nei chin chiah pawm a ni tawh ang. He dan hmang hian state/ UT-a mihring nuai 10 chin zel tan MBBS seat 100 neih phal a ni," tiin, NMC chuan medical college tharte chu seat 50-150 inkar chauh nei thei tawh turin a sawi.

Lok Sabha-a Health Ministry data theh luh, 2021 dinhmun aṭanga a lan danin Tamil Nadu hian mihring vbc 7.64 tan seat 11,600 a nei a, Karnataka-in seat 11,695, Andhra Pradesh-in seat 6,435, Kerala-in seat 4,655 leh Telangana-in seat 8,540 te an nei. NMC dan thar hmang hi chuan Tamil Nadu hian seat 7,600 vel a nei ang a, Karnataka-in seat 6,700, Andhra Pradesh-in seat 5,300, Kerala-in seat 3,500, Telangana in seat 3,700 te a ni tawh ang.

Congress hruaitu P. Chidambaram chuan doctor senior leh medical field-a thawkte pawhin NMC thutlukna chu ṭha taka thil titute tana harsatna siamtu leh state sorkar thuneihna ngaihnepna anga an ngaih thu a sawi a, doctor-te chuan eng vangin nge state sorkarin ama thu leh ama sum senga a zirlaite tana medical college a din mai theih loh ang tih chu an zawhna a nih thu a sawi. Public health consultant, KR Antony pawhin NMC thil tihdan chuan medical lama zirna chu sum siamna hmanrua maiah a chantir niin a sawi ve bawk.