Farm law duh lohna tractor rally-ah Rahul Gandhi tel

Sorkar laipuiin sawisel hlawh tak farm law a pass tak duh lohna lantirin nimin aṭang khan ni thum awh tur tractor rally chu neih ṭan a ni a, he rally hi Congress hruaitu Rahul Gandhi chuan a telpui. 

Rally neih hmaa Moga-a Badni Kalan-a vantlang inkhawm buat­saihah, Rahul Gandhi chuan ram pumah hri leng vanga kan buai laia sorkar laipuiin hmanhmawh taka he dan hi hmang nge a nih tih a zawt. "Loneituten he dan siam thar hi duhin hlim viau ni se eng vangin nge ram pumah  nawrh an huaihawt kher ang?" tiin a zawt a ni. 

Tractor rally, 'Kheti Bacho Yatra' tia vuahah hian mi tam tak an tel a, ni  thum chhung hian km 50 chuang kawng an zawh dawn a ni. 

Farm law thar hi ram pumah loneituten nasa takin an dodal a, he dan thar hi Minimum Support Price (MSP) system tihchhiatna tur nia sawiin, loneitute chu sumdawng liante thuhnuaiah a kuntir dawn a ni, an ti. Hetih lai hian sorkar lam chuan MSP system thlak danglam a ni lo a ti thung. 

Parliament chuan tun hnaiah Farmers' (Empowerment and Protection) Agreement of Price Assurance and Farm Services Bill, 2020, Farmers' Produce Trade and Commerce (Promotion and Facilitation) Bill, 2020 leh The Essential Commodities (Amendment) Bill 2020-te a pass a ni. Heng bill-te hi President Ram Nath Kovind chuan pawm sak tawhin, September 27 aṭang khan dan, law-ah chantirin hman ṭan nghal an ni.