OPS hman leh phutin sorkar hnathawkte pung khawm

New Delhi-a sorkar hnathawkte chuan National Movement for Old Pension Scheme (NMOPS) hminga intel khawmin Pathianni khan Ramlila Maidan-ah an kal khawm a, New Pension Scheme (NPS) hnawla, Old Pension Scheme (OPS) hman leh phutin sorkar an nawr. Kal khawmte hi central leh state-a sorkar hnathawkte an ni a, eptu party hruaitu zingah, AAP Rajya Sabha MP, Sanjay Singh, Haryana CM hlui Bhupinder Singh Hooda leh BSP M Shyam Singh Yadav te chuan an telpui a ni.

Joint Forum for Restoration of Old Pension Scheme (JFROPS) leh National Council of Action (NJCA) te chuan OPS hman phuta nawrhna hi an huaihawt a, an pension huna an hma hun tur an ngaihtuahin, an dinhmun chu a chhia niin an sawi. NMOPS hruaitu, Vijay Kumar Bandhu chuan,"OPS hman leh a nih theih nan hian nasa takin kan bei a, hei vang hian state ṭhenkhatah chuan OPS hman a ni leh tawh. Keini chuan central sorkarin a sut a nih chuan state kuta thutlukna a awm a ngai dawn lo tih hi kan hria. Hei vang hian New Delhi-a Ramlila Maiden-a rawn kal a sorkar nawr hi kan ni," tiin a sawi.

Ramlila Maidan-a nawrh huaihawtnaah hian state 20 aṭanga sorkar hnathawk eng emaw zat an kal niin a huaihawttute chuan an sawi a, pung khawmte hian kum 2024 Lok Sabha inthlanpuiah pawh OPS hmang leh tura hma la tura tiam theitu chauh thlan tlin tur an ti. Old Pension Scheme hman leh hi eptu party, AAP leh Congress te chuan an thlawp thu an sawi bawk.

OPS hnuaiah hian sorkar hnathawkte chuan an pension hnuah an hlawh lak hnuhnun ber aṭanga 50% chu thla tin pension hlawh atan an la ṭhin a, NPS hmang erawh chuan sorkar hnathawkte chuan an basic pay aṭanga 10% leh Dearness Allowance te chu state sorkar hnenah chhung lutin, an pension hlawh sorkarin a pek tur chu an tumpui ṭhin. He an pawisa thawh hi Pension Fund Regulatory and Development Authority (PFRDA) pawmpui pension fund eng emaw berah invest leh ṭhin a ni a, heta ṭanga rawn let leh hi an la ṭhin a ni.