Journalist-te'n media commission din rawt

Indian Journalist' Union (IJU) hminga journalist intel khawm chuan Pathianni khan all-India seminar neiin, chanchinthar lakhawmtute'n nitina harsatna an tawh ṭhin tiziaawm tur leh, thu dik hai chhuaka puang ṭhintu journalist-te venghim a, thu dik lo theh darh venna tur atan sorkar laipui aṭanga dan siam a, media commission din an rawt.

Media commission siam rawt a nih chungchang hi IJU President, SN Sinha chuan seminar neih zawha thuchhuah an siamah sawiin,"Nitina media mite'n beihna kan tawh ṭhin laka venhimna kan mamawhna hi sorkar hian min hriatsak se kan duh. Thu dik puangtu kan nihna angin beihna kan tawh ṭhin laka dan venhimna hnuaia kan awm a ngai a, thu dik lo theh darh awm ṭhin venna tur dan pawh kan mamawh a ni," tiin, Press Council of India chu constitution behchhan chuan ṭha viau angin lang mah se commission ang thuneihna a neih loh avangin media commission din ṭul a tih thu a sawi.

SN Sinha chuan state leh UT eng emaw zat aṭanga IJU mi leh sate chuan he seminar-ah hian sawihona neiin print media, electronic media leh social media hmanga journalist hna thawkte'n beih, vau leh tihbuai an tawh ṭhin chu dan ṭha tak hmanga titawp tura central sorkar an beisei thu a sawi. Seminar-ah hian media protection act leh media commission din rawtna chungchang an sawiho a ni.