Delhi Police-te'n ISIS firfiak man

Delhi Police-te chuan nimin khan National Investigation Agency (NIA) 'most wanted' list-a awm, ISIS firfiakte nena inzawmna nei nia puh, Shahnawaz, Shafi Uzzama tia hriat bawk chu Delhi-a a bihrukna hmun aṭanga an man thu an puang.

Shahnawaz hi NIA-te nena thawkho, Delhi Police special cell te chuan manin, Shahnawaz bakah hian a thawhpui nia hriat mi panga an man tel thu leh thu zawh fiah tura an kawl mek thu an sawi. Shahnawaz hi engineer niin Pune-a ISIS dinna kawnga inhnamhnawih man tum zinga mi a ni a, Delhi mi, Pune-a khawsa a ni. Police-te'n Pune an dap khan Delhi-ah tlan chhe lehin a biru zui. NIA hian tun thla tir khan Shahnawaz leh firfiak dang pathum, Rizwan Abdul Haji Ali, Abdulla Faiyaz Shaikh leh Talha Liyakat Khan te chanchin emaw awmna hrilh thei emaw hnenah lawmman Rs. nuai 3 pekna tur thu an lo chhuah tawh a ni.

Man a nih lai hian Shahnawaz hian chemical substance eng emaw a kawl niin police-te chuan an sawi a, hei hi mansak a ni bawk. Police-te chuan thil ṭha lo atana hman theih leh hman tur ni awm tak, Improvised Explosive Device (IED) siam theihna hmanrua ni ngeia hriat pawh an man tel thu an sawi bawk.