Bihar sorkarin caste census data tichhuak; CM Nitish Kumar-a'n all party meeting ko

Bihar sorkar chuan Thawhṭanni khan caste census data tichhuakin Bihar-a mihring awm zawng zawng vbc. 13.1 aṭanga 36% chu Extremely Backward Class-a mi niin, Backward class-ah 27% an awm a, Scheduled Caste 19.7% niin, Scheduled Tribe 1.7% leh general-ah 15.5% an awm niin an tarlang.

Bihar puma mihring awm zat aṭanga lakin OBC chu group tam ber niin 14.27% an tling, Dalit emaw Scheduled Caste an tihte chu Bihar population aṭanga 19.65% an ni pha bawk, hetah hian Scheduled Tribe nuai 22 dawn (1.68%)- te an tel a ni.

Bihar chief minister Nitish Kumar chuan survey aṭanga an thil hmuh chhuah chu state pakuaa caste census neih thlawptu legislature party aiawhte zawng zawng hnenah pek an nih tur thu a sawi. Kumar chuan,"Thil thui tak leh tam tak sawi theih la ni lo mah se, he caste census hmang hian sorkarin hmalakna neih turah ngaihtuahna a sen thiam phah dawn a ni. Thlei leh thliar nei loin he survey data hian mi zawng zawng mamawh phuhru turin min pui thei dawn a ni," tiin a sawi. Caste census data tihchhuah a nih hnu hian CM Kumar chuan an thil hmuh chhuah anga hmalak chhunzawm dan tur leh thil nihna kimchang zawk inhrilhhriatna nei turin nimin khan all-party meeting a ko.

Caste census data tihchhuah a nih avang hian prime minister Narendra Modi chuan eptu party-te chu hnam leh chi hminga ram ṭhenhran tumah a puh a, hnam emaw chi bil emaw hmanga mipui ṭhen tum chu sual a nih thu a sawi. Hetih lai hian Congress hruaitu Rahul Gandhi chuan,"Sorkar laipuia secretary 90 zinga pathum chauh hi OBC an ni, hengte hian India budget pumpui 5% chiah an khawih. India rama chi awm dan hriat hi a ṭul hle a ni," tiin, Madhya Pradesh assembly inthlana an chak chuan caste census an neih ve tur thu kar hmasa khan a lo sawi tawh bawk.

Caste census neih hnuhnun ber hi 1931 kha a ni a, Bihar cabinet hian nikum June 2 khan caste survey neih hi pawm tawhin, sum senso atan Rs. vbc 500 a lo pawm tawh bawk a ni.