Maharashtra hospital-ah ni hnih chhungin mi 48 thi

Nanded, Maharsahtra-a Shankarrao Chavan Government Hospital-ah October 1 aṭang khan chhan hriat loha mitthi an pung nasa hle a, Thawhṭanni zan tlai tawh tak thleng khan chhinchhiah chinah mi 31 thi tawhin, heng zinga 16 hi nau piang hlim an ni.

Hospital-a enkawl lai, mi 71 te chu dinhmun hlauhawmah an ding mek nia hriat a ni bawk.

Nanded damdawi ina thihna thleng tam chho thut chungchangah hian hospital dean, Dr. Shyamrao Wakode chuan thawktute'n damlote an ngaihsak loh vang tih chu thu dik lo a nih thu leh, ṭhenkhatin damdawi indaih lohna vang an tih chu thu belhchian dawl lo a nih thu a sawi. Maharashtra Medical Education Minister, Hasan Mushrif pawhin Nanded hi a pan nghal a, "Thihna thleng zawng zawng kan zir chiang anga, inthlahdah vang a nih chuan hrem ngai apiang kan hrem ang," tiin chanchinthar la khawmtute a hrilh.

Maharashtra sorkar official-te pawhin Nanded-a sorkar damdawi ina thihna thleng tam lutuk chhui chiang tura committee an din tawh thu sawiin,"Chhatrapati Sambhajinagar district aṭangin mi pathum awmna committee din a ni a, he committee hian report a buatsaih dawn a ni," an ti.

Hetih lai hian Nanded district thuneitute chuan nau piang hlim thi zinga 12 te chu an pian hlima an rih zawng pawh dan pangngai aia hniam a nih thu an sawi. Puitling 12 thi zingah hian mipa panga leh hmeichhia pasarih awmin, mi palite hian lung lam ṭhat lohna an nei sa a, pakhat chuan tur a ei a, pakhat hi thin ṭha lo niin, pahnih hi kal ṭha lo nei sa leh pakhat hi rai laia harsatna nei ang chi a ni bawk niin an sawi thung. "Paediatric department-ah hian in-admit 142 awmin, mi 42-te dinhmun hi a hlauhthawnawm a, oxygen leh ventilator-te erawh kan nei. Damlote hi district ṭhenawm, Hingoli, Parbhani leh Washim mai bakah ṭhenawm state Telangana aṭanga lo kalte pawh an awm a ni," tiin an dinhmun an sawi fiah.