India-in palai 41 ko haw turin Canada a hriattir

India leh Canada inkara innghirnghona kaihhnawihah an rama palai awmte ve ve chu haw turin an hriattir tawh a, India hian nimin khan hrattirna pe nawn lehin, India-a Canada palai leh embassy-a thawk mi 41 te chu a rang lama haw tura hriattir lehin, October 10 ral hmaa India chhuah san turin a ti. Canada embassy-a thawk hi mi 61 awmin India hian hei hi tihtlem a duh thu a sawi tawh a ni.

Canada hian June thlaa Canada, British Colombia-a Khalistan firfiak, Hardeep Singh Najjar kah hlum a nih chungchangah India leh India mi tirh agent chuan inhnamhnawihna nei ngeia hriain, India chu Canada ram inrelbawlna leh thuneihna zah loah a puh a ni. Hetih lai hian India erawh chuan Najjar thah a nih chungchangah hian inrawlhna a nei lo niin a sawi thung a, Canada-in firfiak a hum chu mak a tih thu a sawi bawk.

External affairs minister S. Jaishankar chuan Canada-a Sikh inṭhen darh duh pawlte chuan India palaite tan harsatna an siam nia sawiin, invauna leh tharum thawh mai duh angin an awm thu a sawi.