PM-in West Bengal-a thlipui tlehna hmun a en Ṭanpuina Rs vbc 1,000 pek a ni dawn tih a puang

Prime minister Narendra Modi chuan nimin khan West Bengal tlawhin, cyclone Amphan in a nuai laite chu helicopter-in a enkual. Thlipui tlehin chhiatna a thlenah hian mi 80 in nunna an chan tawh a ni. 

Prime minister Modi hi Bengal chief minister Mamata Banerjee leh governor Jagdeep Dhankar te an ṭawiawm. 

Thlipui tlehna hmunte an enkual hnuah, PM chuan Barishar-ah review meeting a nei  leh nghal a, hetah hian West Bengal ṭanpuina turin cheng vaibelchhe 1,000 pek a nih tur thu a puang. Thlipuiin thil a tihchhiat hrang hrangte din thar leh dan pawh ngaihtuah a ni dawn tih sawiin, West Bengal state in hun harsa tak a tawh  mekah sorkar laipui chuan a dinpui zel dawn a ni, a ti. Chhiatna thleng dante enfiah turin central team-in Bengal hi an tlawh thuai tur thu a sawi bawk. 

Cyclone Amphan hian Nilaini khan Bengal state hmun tam tak na takin a nuai a, state khawpui Kolkata pawhin he thlipui tleh hi a tuar a ni. Chenna in tam tak a chhia a, thingkung leh electric bante pawh a tlu nasa hle. 

Modi-an a tlawh hma hian CM Banerjee chuan cyclone Amphan chu a hriat theih chinah an state-a chhiatna thlen nasa ber a ni tih sawiin, thlipui district 7-8-a cheng, an state mipuite 60% in a tuar a ni, a ti. Thlipui tlehin thil a tihchhiat hi cheng vaibelchhe nuai khat hu zet nia sawiin, chhiatna a thlen dante enfiah turin PM hi a lo ngen tawh bawk. State sorkar chuan thlipui tleh dawn vang hian tuipui kama cheng, mi nuai nga dawn chu hmun him lamah a lo sawnchhuak lawk a ni. 

PM chuan thlipui tleh vanga thi chhungte chu zangnadawmna cheng nuai hnih ṭheuh pek an ni dawn a, hliam tuarte pawh Rs 50,000 ṭheuh pek an ni dawn tih a sawi. 

West Bengal a tlawh hnuah PM hian thlipuiin a nuai tel, Odhisa state a pan leh a ni. Thlipui tleh hian Odisha-ah pawh chhiatna a thlen nasa hle a, tuipui kam district-ah power leh telecom infrastructure te pawh a tichhe nasa hle a ni. 

Nimina thlipui tlehna hmun state pahnihte enfiaha PM a zinchhuah hi March 24-a ram puma hri leng vanga lockdown puan a nih hnua Delhi a chhuahsanna hmasa ber a ni. Lockdown puan chu la zo lo  mah se, West Bengal leh Odisha-a chhiatna nasa tak thleng chu  national emergency ang hial a nih avangin thil awmdan thlithlai turin  PM hi a zinchhuak tih official-te chuan an sawi.