Sonia laka FIR thehluh sut turin Congress-in an phût

Congress president Sonia Gandhi laka FIR thehluh a nih hnu lawkah Karnataka Congress chuan an party hruaitu hekna chu thil chimawm tak a nih thu sawiin sut leh turin an phût. Congress party chuan ramchhunga buaina chawh chhuah tumnaah an puh bawk. 

FIR hi Shivamogga district-a Sagar khuaah thehluh niin Advocate Praveen K V chuan Ningani khan a thehlut a ni. FIR-ah hian Indian National Congress chuan May 11-a tweet an siamah Prime Minister leh sorkar laipui chu dawtin an puh niin a tarlang a, Police-te chuan IPC section 153 leh 505(1)(B) hnuaiah case an ziak lut a ni. INC hian May 11 hian PM Care fund chu miretheite tan ni lo, a hmanna tur dik loah an hmang niin twitter-ah hian an tarlang.

Congress hruaitute chuan an president laka FIR thehluh chu thudik lo behchhana thehluh a nih thu leh thudik enfiah hmasa loa thehluhah an puh a, BJP hruaitute leh Praveen Kumar chuan INC thu post chu an lakawi lui niin an Karnataka chief minister Yediyurappa hnena lehkha an thawnah an ziak.

Karnataka unit INC president D K Shivakumar chuan thubuai ziakluttu police officer chu suspend turin CM chu a phût bawk.