RBI-in kum 20 chhunga interest rate a tihhniam ber ṭum a thleng

Reserve Bank of India (RBI) govenor Shaktikanta Das chuan ram chhunga commercial bank ten RBI aṭanga hun reilote chung atana pawisa an puk theihna interest rate, repo rate chu 4.40 aṭangin 4% a tihhniam a nih thu nimin khan a puang. 

Reverse repo rate pawh 3.75% aṭangin 3.35% a tihhniam a ni a, hei bakah hian marginal standing facility (MSF) rate leh Bank Rate pawh 4.25% a tihhniam ve ve a ni. RBI-in nimina monetary policy-a interest rate a tihhniam hi kum 20 chhunga a la tihhniam ber ṭum a ni.

Covid-19 hri leng vangin ram chhunga inkhuahkhirhna hrang hrang hman a ni a, hei vang hian sumdawnna a kal mumal thei lo a, nitina inhlawhfatan leh eizawng tan harsatna a tlen pha a ni. Hengte avang hian ram chhungah thil mamawhna (demand) a tlahniam a, sum che vel a tlem pha a ni. Ram chhunga sum che vel a tam theih nan RBI chuan monetary policy hmangin interest rate-te hi a tihniam a ngaih phah ta a ni. 

RBI governor chuan loan Mora­torium period pawh thla thum chhung atan pawhsei a nih thu a sawi. Kum 2020-21 India GDP growth rate chu negative a nih dawn thu governor chuan a sawi bawk. India chuan foreign exchange reserve-ah May 15 thleng khan US dollar vaibelchhe 487 a nei tih governor chuan a sawi bawk.