Delhi LG-in police hotu a ko

Delhi Police-ten zirlai nawrh huaihawtte kut an thlak lai video chu social media lamah nasa taka thehdarh a nih hnuin, nimin khan Delhi Lieutenant Governor Najib Jung chuan Joint Commissioner of Police (Central) SK Gautam chu thil awmdan sawifiah turin a ko.

Thawhṭanni khan Hyderabad University-a research scholar Rahith Vemula intihhlum chung≠changah, a intihhlumna chhana puhte hremna pek phutin Delhi-a zirlaite chuan RSS headquarters kawtah nawrh an huaiawt a ni. Delhi Police-te chuan Jawaharlal Nehru University zirlai nawrh huaihawtte hi hnawhdarh an tumnaah na tak takin kut an thlak a, kut an thlak lai video hi internet lamah a darh zui ta a ni.

Nimin zing khan Delhi Police-te chuan zirlai pawlten lungawi lohna an lantir chhunzawm avangin an headquarters chhehvelah Section 144 an hmang zui nghal a ni.

Delhi Police hotu BS Bassi chuan zirlaite chunga mawi lo taka che police officer-te chungah action lak ngei a tiam a, hemirual hian zirlaite pawh tharum thawhna lam hawi zawng≠a che lo tur leh, dan leh thupek zawm turin a ngen nghal bawk.

Bassi chuan, "Mi tupawhin boruak ṭha tak hnuaia lungawi lohna lantir turin dikna a nei a, mahse dan leh thupek tibuai zawngin a che tur a ni lo. Supreme Court thupek angin Delhi khawpuia nawrh huaihawt turte chuan DCP hnen aṭangin phalna an la phawt tur a ni" a ti.

Nimin vek khan Delhi Commission for Women (DCW) chuan thla nga kalta chhunga Delhi khawpui hmeichhiate chunga pawikhawihna thleng chungchang data an thehluh loh vangin Delhi Police hotu hi a ko ve bawk. Police hnena lehkha a pekah, DCW chuan, "Commissioner chuan vawi tam tak hriattirna lehkha a pek hnuah Delhi Police-te chuan tun thlengin report an la thehlut lo a ni. Commission chuan Delhi khawpui chhunga hmeichhiate harsatna tawh leh an himnate chu a dah pawimawh hle a ni" tiin a sawi.

DCW hotu Swati Maliwal chuan nikum November thlaa Delhi LG Jung-an hmeichhiate himna chungchanga meeting a buatsaih ṭumin, police hnen
aṭanga data an dawn loh thu hi a lo sawi chhuak tawh tih a sawi. Hemi hnu hian vawi tam tak document mamawhte thehlut turin police department hi hriattir an ni tawh a, tun thlenga an la thehluh lohna chhan chu sawifiah tura an duh thu a tarlang.