Nitish Kumar-an darkar 9 chhungin complaint 1,000 ngaithla
Bihar Chief Minister Nitish Kumar chuan Thawhṭanni khan state mipuiten a hnena harsatna an thlenna tur hun, ëJanata Ke Darbar Mein Mukhya Mantrií, mipui court tia sawi chu a buatsaih.
Nitish Kumar hian a programme buatsaihah hian darkar kua chhungin harsatna hrang hrang thlentu mi 1,000 chuang a hmu hman. Hei hi CM term thar a chelh hnua mipui court a buatsaih lehna hmasa ber a ni.
Chief Minister office chuan thuchhuah siamin, CM hian mi 1,007 te harsatna hrang hrang a ngaihthlak sak a, an zingah han hmeichhia 218 an tel a ni, a ti. CM hian harsatna hrang hrang an thlente chu lo enzui sak nghal turin state police hotu PK Thakur leh official dangte a hrilh nghal bawk.
Kumar hian kum 2005-a thuneihna a chan aṭang khan thla khat chhungin Thawhṭanni vawithum, mipuiten an hmuh theihna hun hi a buatsaih a; an thu ngaihtuah tur bikte an thlang chhuak ṭhin.
Nikuma Assembly inthlan an neih dawn vang khan Janata Durbar hi September thla aṭang khan tihtawp lailawk a ni a, inthlanah hnehna changin sorkarna a siam chhunzawm hnuah mipui court pawh hi a siam zui leh nghal a ni. Janata Durbar buatsaiha tel tum hian state chhung thingtlang khaw hrang hrang aṭangin Patna hi an pan a, CM hnenah anmahni ngeiin an harsatna tawh hrang hrangte hrilhna hun siamsak an ni chu lawmawm an tih thu an sawi.