MGNREGA fund an titlem lo

Union Finance Minister Arun Jaitley chuan NDA sorkar chuan MGNREGA scheme chu a kalpui chhunzawm zel bakah, he scheme atana sum an hman pawh kum dang aiin a tam zawk niin a sawi.

Congress kaihhruai UPA sorkar hunlai khan thingtlang mite tana inhlawhna tur, Mahatma Gandhi National Rural Employment Guarantee Act (MGNREGA) hi siam a ni a, NDA a sor≠kar hnuah pawh scheme hi kalpui chhunzawm zel a ni.

Arun Jaitley chuan NDA sorkarin he scheme hi tihtawp a tum nia thuthang awmte chu thu dik lo a nih thu sawiin, "Sorkar thar hian he scheme hi chak zawkin a kalpui bakah, scheme tana fund dah pawh a tipung zawk a ni" a ti. March 31-a fiscal year a tawp hunah he scheme atana sum pek≠chhuah chu a san ber ṭum a ni dawn a ni, a ti.

UPA sorkar laiin, kum 2006 February thla khan hetih≠laia Prime Minister Manmohan Singh leh Congress President Sonia Gandhi-te chuan UPA flagship programme, MGNREGA scheme kalpui a nih thu an puang. Kum hnih hnu, kum 2008 April thla khan India ram chhunga district tinah kalpui vek a ni. Scheme kalpui a nih ṭan hian cheng vaibelchhe 3.14 rua≠hman a ni a, heng zinga 71% chu hnathawktute hlawh atan sen a ni.

MGNREGA scheme hnuaiah hian job-card neite tan ni 100 inhlawhna siamsak an ni. Tunhnaiah sorkar laipui chuan khawkheng vanga harsatna tawk bialahte ni 50 dang inhlawhna hun a pek belh.