Ni khatah hri kai hmuh chhuah 6,088 awm belh leh

India ramah Covid-19 kai hmuh chhuah belh zel an ni. Ningani khan he hri kai hmuh chhuah belh hi mi 6,088 awmin, nikhata hri hmuh tam ber ni a thleng leh. 

Union health ministry chuan ram pumah he hri kai hi nimin thleng khan mi 1,18,447 an awm tawh a, an zinga mi 3,583 in an thihpui tawh tih a sawi. Ningani kha he hri vanga thi hi mi 148 an awm a ni. Ministry chuan hri kai thihpui zinga 70% chuang chu a hmaa natna benvawn lo nei sa an nih thu a sawi. 

Maharashtra chu hri kai tamna ber state a la ni zel a, Covid-19 kai hmuh chhuah tawh hi mi 41,642 an awm tawh. Tamil Nadu (13,967), Gujarat (12,905), Delhi (11,659), Rajasthan (6,227), Madhya Pradesh (5,981) leh Uttar Pradesh (5,515) ten an dawt.