Delhi: MDC worker-ten kawngpui an dang

Municipal Corporation of Delhi (MCD) hnuaia thawkte chuan an hlawh pek phutin nimin khan a ni riatna atan nawrh an huaihawt chhunzawm zel. Kawngpui hrang hrang an dan avangin traffic pawh a buai phah hle a ni.

MCD worker-te chuan hun eng emaw chen hlawh an lak theih tawh loh avangin nawrh hi an huaihawt a, nawrh huaihawt zingah hian khawlai thianfaitute pawh an tel avangin Delhi khawpuia chhunga hmun tam takah bawlhhlawh a intiang khawm nasa tawh hle.

Nawrh huaihawtte chuan Delhi sorkar leh sorkar laipui hnenah ngenna thlenin, MCD in sum lama harsatna a tawk mek chu pui turin an ngen.

Thawhlehni khan Delhi Lieutenant Governor Najeeb Jung chuan hnathawktuten hlawh an lak theihna atan Delhi sorkar hnenah civil body-te hi intiamna neia loan pe mai turin a ngen. Lt Governor hian nimin khan Union Home Minister Rajnath Singh a hmu bawk.

Hetihlai hian Delhi-a AAP sorkar chuan MCD worker-te nawrh huaihawt chu BJP-te fuihpawrh leh, politics khelhna hmanruaa hmangah a puh. Delhi Home Minister Satyender Jain chuan MCD hnathawkte hi December thla hlawh pawh pek an ni a, hetichunga nawrh an huaihawt chhan chu a hriatthiam loh thu a sawi. Civic body pathumte hian Thawhlehni khan Delhi High Court hnenah hnathawkte chu December, 2015 thleng an hlawh pek vek an nih thu an hrilh a ni. Hetihlai hian hnathawktute chuan thla thum chhung hlawh an la tawh lo niin an sawi thung.

Jain chuan BJP sorkarna, corporation pathuma councillor leh mayor-te chu nawrh huaihawt chungchanga an inrawlh dan hriat a duh thu a sawi. "Tunah chuan he thil hi politics thil a ni tawh. Hlawh pek an nih si chuan eng vangin nge an nawrh? BJP hian politics khelin, mipuite rilru a hruaikawi a ni" a ti. Delhi sorkar chuan MCD tana sum a pek turte chu a pechhuak vek tawh a ni, a ti.

Ni riat zet nawrh huaihawt a nih tawh avangin civic body enkawl hospital leh school eng emaw zat chu chu khar an ni a, khawpui chhungah bawhhlawh tam tak a intiang khawm tawh bawk. MCD enkawl damdawi-inah chuan emergency ward chauh hawn a ni a, hei vang han damlo in entir tura kalte pawh Delhi sorkar enkawl damdawi-inte kawhhmuh zel an ni.

MCD worker nawrh huaihawtte hi nuai khat vel zet an ni a, doctor, nurse, engineer, zirtirtu, tehnician, sanitation worker bakah class III leh IV staff-ten an zawm a ni.

Delhi Chief Minister Arvind Kejriwal chuan MCD worker te harsatna chu mi tinte lungawina leh pawmtlan theih tur zawnga chinfel an tum tih a sawi a, nawrh huaihawt mek pawh tihtawp thuai beisei a nih thu a sawi bawk.