Anupam Kher-an Pakistan palai sawmna hnar

Pakistan sorkarin lemchan thiam, Anupam Kher-an Karachi Literary Festival-a kal tuma visa a dilna a hnawlsak chungchang chuan sawizui a hlawh hle.

Anupam Kher-a visa dilna hnawlsak a nih hnuin, nimin khan Pakistan Commissioner Abdul Basit chuan Kher hi biain, Karachi-a kalna tur visa hi a dil nawn leh a nih chuan pek a nih tur thu a hrilh. Mahse Kher chuan a sawmna hi hnarin, programme dang a lo neih tawh thu a hrilh a ni. Karachi Literary Festival hi Zirtawpni aṭang hian neih ṭan ni dawn a, ni li awh tur a ni.

Pakistan sorkarin a visa dilna a hnawlsakna chhan chu Kashmir buaina chungchanga a ngaihdan a sawi vang leh, Prime Minister Narendra Modi a thlawp vang nia a ngaih thu Kher chuan a sawi.

Hetihlai hian Delhi-a Pakistan High Commission chuan Kher hian visa dilna hi a thehlut lo a, hei vang hian a dilna hnawlsak tih chungchang hi a dik lo tih a sawi.

Mahse Anupam Kher chuan Thawhlehni khan Karachi Literary Festival hman tumin mi 18-ten visa an dil a, heng zingah hian a dilna chauh chu hnawlsak a nih thu a sawi a ni. Kher chuan Pakistan visa a dil hi ṭum thum hnawlsak a nih tawh thu a sawi bawk. "Ka thin a rim lo a, mahse ka rilru a na a ni. Eng vangin nge mi 18 zingah keimah chauh hnawl ka nih bik" tiin press conference a neihah a sawichhuak.

Pakistan sorkarin Anupam KHer ruala visa diltu, a pawmsak zingah zingah hian Congress hruaitu Salman Khurshid bakah lemchan thiam Nandita Das te an tel.