Firfiakte a beih let chuan Pakistan kan thlawp zel ang : Rajnath Singh

Union Home Minister Rajnath Singh chuan Pakistan-in a ram chhunga firfiak inkhuarte laka action a lak chuan India-in a thlawp zel tur thu a sawi.

India Foundation leh Rajasthan sorkar ṭangkawpten Jaipur-a counter-terrorism conference an buatsaihah thu sawiin, minister chuan "India rama firfiakte pawikhawihna tam ber hi Pakistan ram aṭanga rawn thlen a ni a, hei vang hian Pakistan chuan firfiakte laka beihpui thlak chu a ngaih pawimawh tak tak a hun tawh a ni. Firfiakte leh an pawlte nuaibo tura hma a la nih phawt chuan, India sorkar chuan a thlawp zel dawn" a ti.

Home Minister chuan Pakistan-in a ram leilunga firfiak awmte laka beihpui a thlak chuan India nena inlaichinnain a ṭhat phah mai bakah, South Asia bial chhungah pawh boruak muanawm tak a thlen phah ngei dawn niin a sawi.

January thla tira firfiakten Pathankot airbase an beih hnu khan pawikhawhtute man ngei an nih theih nan Pakistan thuneitute nen pawh an inbepawp reng tih minister chuan a sawi. 'Minister level bakah NSA level lamah pawh kan inbepawp reng a, information kan pek aṭang pawhin pawikhawihtute zawnchhuahna kawngah chak zawka hma an lak theih ngei kan beisei a ni" a ti.

Pathankot airbase beih a nih hnu hian sorkar laipui chuan firfiakte beihletna kawnga a hmalaknate a ennawn leh tih sawiin, "Nakin zelah pawh firfiakte beihna lak aṭanga kan ram venhimna puitu tur ruahman

nan ṭha tak kan siam mek a ni" a ti.

Western sector-a airbase zawng zawngah chuan dan loa lutrute chu kah phalna thupek tihchhuah vek a ni tawh a, hei bakah hian ramchhunga airbase zawng zawngte security system thuam ṭhatna tur, cheng vaibelchhe 8,000 chuang senga siam tur pawh ruahman mek a ni.

Security plan-ah hian air base hungna changtlung zawk, mi che vel lo man thei system dah telna tur te, CCTV, anti-intruder alert, mini drone leh thildangte dahna turte telh a ni.