Maha CM hlui thubuai siamsak remti

Maharashtra Governor C Vidyasagar Rao chuan Chief Minister hlui, Congress hruaitu Ashok Chavan chu Adarsh Housing Society thil tih dikloh kaihhnawihah thubuai siamsak phalna a pe.

CBI hian Justice Patil Commission of Enquiry leh Bombay High Court thusiam bawhzuiin, CrPC section 197 hnuaiah Chavan-a thubuai siamsak hi Governor hnenah hian a dil a ni. Govenror hian Council of Minister-te thurawn angin a lo remtih sak.

Thupek tihchhuah anih hnu hian Chavan chuan BJP sorkar chu sawiselin, a laka phuba lak tumna hmanrua niin a puh.

Ashok Chavan chuan Maharashtra Pradesh Congress Committee (MPCC) a nihna aṭanga ban a tum loh thu sawiin, dan hremite a rawn tur thu a sawi.

CBI chuan Adarsh society in indona hmuna kal sipaite tana flat luah tur a sakah Ashok Chavan hian a chhungkhat lainate awmna tur a siam belh tir niin a puh.

Kum 2012 aṭanga Adarsh scam a chhui hnuah CBI hian thil dik lo tihnaa inhnamhnawiha puhin mi 13 lakah thubuai a siamsak tawh a ni. An zingah hian IAS officer leh Adarsh Housing Society office bearer-te pawh an tel. He buaina kaihhnawih avang hian kum 2010 khan Chavan hi CM anihna atangin a ban phah a ni.