Siachen-ah vurtawlhin sipai 10 a chhilh

Jammu and Kashmir-a Siachen Glaciers-ah Nilaini khan vurtawlhin sipai 10 a chilh a, sipaite chhanchhuah tum hian theihtawp chhuah mek a ni.

Sipaite hi 19 Madras battalion mi niin, an post hi Siachen Glacier khawthlang lam, Satoro ridge-a feet 19,600 vela sangah a awm a ni. Nilaini khan kilometer khat vela zau vur tawlhin an post hi a chhilh a ni. Sipaite hi chhanchhuah tumin beih nghal ni mah se, nimin thleng khan hmuh an la ni lo.

Siachen glacier-a feet 15,000 aia sang post-a sipai awmte hian oxygen cylinder an inchhawp tel vek a, hei vang hian vurin a chhilh sipaite pawh hian hun eng emaw chen chu an oxygen pai hi an hman theih rin a ni.

Kashmir hmartawp, Ladakh biala awm, Siachen Glacier hi khawvela indona hmun sang leh vawt ber niin, a san lam hi a tlangpuiin feet 20,000 te an ni. He hmuna awm sipai thi zinga tam zawk chu indona vang ni loin, khawvawt tuar loa thi an ni. Kum 1980 chho aṭang khan Saltoro Range leh Siachen glacier-a sipai dah zinga 869 chu khawvawt vangin an lo thi tawh a ni.

Siachen Glacier-a sipai dahte chu a rei berah thla thum awm tura tih an ni
ṭhin. Sorkar laipui chuan sipai awm≠te enkawlna atan ni khatah cheng vaibelchhe 5 zel a seng anga chhut a ni bawk.