External Affairs Minister-in Sri Lanka a tlawh

External Affairs Minister Sushma Swaraj-i chu ni hnih cham turin nimin khan Sri Lanka-ah a zin.

Sushma Swaraj hi airport-ah Sri Lanka Minister Mangala Samaraweera-an a lo hmuak. Hruaitu pahnihte hian nimin vek khan Colombo-a 9th Joint Commission meeting buatsaih an kaihruai dun a, he meeting-ah hian ram pahnihte thawhdunna leh harsatna hrang hrangte an sawiho a ni.

Joint Commission hi kum 1992-a din a ni a, ram pahnihte thawhdunna chungchanga harsatna awm theite chinfel dan kawng ngaihtuahtu atana tih a ni. Meeting neih hnuhnun ber chu kum 2013, January thla khan New Delhi-ah an nei.

Ministry of External Affairs thupuangtu, Vikas Swarup chuan minister hian Sri Lanka hruaitute chu an rama Tamil mite dinhmun leh, sangha mantute chungchang pawh a sawipui dawn tih a sawi. Sri Lanka sorkar chuan India mi sangha mantute chu a ram chin tuipuia luta sangha man ṭhinah a puh a, mahse sangha mantute hian hei hi an pha thung.

Swaraj-i hian a cham chhungin Sri Lanka President Maithripala Sirisena, Prime Minister Wickremesinghe, president hlui Chandrika Kumaratunga bakah official dangte a kawm ang. Vawiin hian Rise of Digital Indiaí exhibition a hawng dawn bawk.