Tualthattu mi 11-te thi tura hremna pe

West Bengal-a Nadia district court chuan kum 2014, November 23-a ram inchuh chungchanga hmeichhia pakhat thattua puh, mi 11-te chu thi turin a hrem. Hremna pek zingah hian Trinamool Congress hruaitu hlui pawh a tel.

Aparna Bag thata puh mi 11-te hi IPC section 307 (attempt to muder) leh 302 (murder) bakah ralthuam an kawl avangin Arms Act sectoin 9B hnuaiah thubuai siamsak an ni tawh a, Nilaini khan thiam loh chantir an ni. Ningani khan Judge Partha Sarathi Mukhopadhyay chuan mi 11-te hremna tur hi a puang a ni.

Thi tura hrem zingah hian West Bengal-a rorellai, Trinamool Congress hruaitu hlui Lankeswar Ghosh a tel a, mahse TMC chuan an party member a ni lo niin a sawi thung.

Kum 2014, November 23 khan Ghosh leh a thurualpuite chuan Krishnaganj block-a Ghungragachhi ram neih tumin tractor nen an kal a, helai hmuna awmten lo dangin an innawr buai ta a ni. Ghosh-a leh a pawlte hian silai an hmetpuak a, hmeichhe pathum an kap fuh. Aparna Bag hi a awmah kap fuhin a thi nghal a, midangte erawh an hliamte enkawl a nih hnuah an damchhuak a ni.