Deonar bawlhhlawh paihna hal chungchang chhui dawn

Maharashtra Chief Minister Devendra Fadnavis chuan Mumbai khawdaia Deonar bawlhhlawh paihna hmun hal a nih chungchang chhui chiang turin thupek a tichhuak.

Deonar bawlhhlawh paihna hal vang hian Mumbai khawpui chu meikhuin a bawh nasa a, khawpui boruak pawh a bawlhhlawh phah hle. Meikhu nasa avang hian Shivaji Nagar leh Deonar-a school 70 chuang zet chu kar kalta khan ni hnih khar a nih phah tawh. Bawlhhlawh halna hmun aṭang hian nimin thleng khan meikhu nasa vak loin a la chhuak chhunzawm reng a ni.

Bombay High Court chuan Municipal Corporation of Greater Mumbai (MCGM) hnenah mihring tana hlauhawm khawp meikhu tihchhuah a nih tawh lohna tura hma a lak dante thehlut turin a hriattir. Justice AS Oka leh CV Bhadang awmna division bench chuan kar khat chhunga affidavit thehlut turin civic body hi a hriattir a ni.

Court chuan Deonar leh Mulund bawlhhlawh paihna hmunte chu a khah vek tawh avangin engtik aṭangin nge bawlh≠hlawh paihna hmun hi a sawn dawn tihte sawichiang turin Corporation chu a zawt nghal bawk.

State sorkar chuan Navi Mumbai-a Taloja-a ram acre 52-a zau leh, Airoli-a ram acre 29-a zau chu bawlhhlawh paihna hmun thar atana hmang turin civil body hnenah hian a hlan tawh niin court a hrilh.

Deonar hi Mumbai-a bawlhhlawh paihna hmun lian ber niin, a ram hi acre 132 zeta zau a ni a, bawlhhlawh intiangkhawmte hi meter 20-a sang an tling tawh nia sawi a ni.