Tanzanian hmeichhia kutthlak vangin police 3 hrem

Bengaluru-a mipui pungkhawmin Tanzanian hmeichhia kut thlak a, a thawmhnaw te an hlihsak avangin an hna thawk ṭha loa puh police pathum chu hrem an ni a, pungkhawm zinga mi pakua chu man an ni bawk.

Tanzanian palai chuan an hnam hmeichhia beih a nih dan hi chi inthliarna vang niin a puh. Nimin khan Tanzanian palai leh foreign ministry official-te chuan pawikhawihna thlen dan enfiah turin Bengaluru an pan.

Bengaluru police hotu N Megharik chuan police pathumte hrem an nihna chhan chu mipui thinrim pungkhawmte thunun tumin hma an la lo niin a sawi.

Tanzanian High Commissioner John Kijazi chuan mipuiten Tanzanian hmeichhia an beihna chhan chu mihang a nih vang a ni tiin, ìHetiang hi kum zabi 21-naa thleng tur a ni tawh loî a ti.

January 31, Pathianni zan khan Bengaluru-ah Tanzanian hmeichhia, kum 21 mi, architecture zirlai chu mipui 200 vel pungkhawmin car aṭanga pawtchhuakin kut an thlak a, a thawmhnaw pawh an hlihsak a ni. Karnataka sorkar chuan a thawmhnaw an hlihsak vek loh thu leh, mihang a nih vanga bei an nih loh thu a sawi. Tazananian hmeichhia leh a ṭhian pathumte chu an car an dintir laiin, Sudan mi pakhat motor khalhin hmeichhia a su a, mipui rawn pungkhawm chuan Tanzanian zirlaite hi an rawn bei ta mai niin a sawi.

Mipui kut tuartu Tanzanian zirlai chuan, ìAfrican mi kan ni tih an hmuh chuan mipuite chuan min umin lungten min rawn vawm a ni. Bus-a kan tlan luh hnuah driver chuan a khalh sawn duh loh avanign mipuite chuan min pawtchhuakin kut min thlak zui ta a niî a ti.

Sorkar laipui chuan Karnataka sorkar hnenah ramdang mi zirlai kuthhlak leh a thawmhnaw hlihsak nia sawi chungchanga report kimchang pe turin a hriattir a, state sorkarin pawikhawihtute chunga action a lak dan leh, zirlai kuttuar himna tura a hmalak dante sawichiang turin a hrilh a ni. Minister of State for Home Affairs Kiren Rijiju chuan, ìHe thil thleng hi rampum tan thil zahthlak tak a ni. Chi inthliarna hi kan rama a thlen kan remti lo. Kum 200 chhung India chu ramdang awpna hnuai≠ah a awm a, chi inthliarna a bo theih nan theihtawpin kan bei a ni. Hei vang hian India ramah chi inthliarna a thleng a nih chuan, sorkar chuan a ngai thutak dawn hle a niî a ti.