AAP-in MP Sanjay Singh man avangin lungawi lohna lantir

Aam Admi Party (AAP) chuan nimin khan Delhi liquor policy thubuai chungchanga AAP Rajya Sabha MP man a nih avanga lungawi lohna lantirin, Delhi-a AAP office, DDU Marg-ah an pung khawm.

Nilaini khan Sanjay Singh hi Delhi liquor policy kaihhnawiha eiruah puhin man a ni a, Enforcement Directorate (ED) chuan a in an dapsak a ni.

Delhi sorkarin a hlih tawh, liquor policy chungchangah hian thubuai ziah luh niin, Sanjay Singh bakah hian kumin March thla khan Manish Sisodia chuan a in dapsak leh man a lo tawk tawh a, bail a dilna zawng zawng pawh hnawlsak a ni bawk. He thubuai kaihhnawihah hian Delhi chief minister Arvind Kejriwal bakah Telagana politician, K. Kavitha leh mi ṭhenkhat dang pawhin an in dapsak leh thu zawh fiahte an lo tawk tawh bawk. Pawisa chheprelh chungchangah ED te chuan sumdawng Dinesh Arora man hmasain, Arora hian Sanjay Singh hi a thawhpui leh bul tumtu niin a puh a ni.

November 2021 khan AAP hian liquor policy thar hi duangin hman a ni a, an policy siam hnuaiah chuan retail-a zu zawrhah sorkar inrawlh tawh loin, mimal license neite'n an zuar thei tawh a ni. He policy thar hnuaiah hian zu dawrte chu zanlai pelh thlenga inhawng thei tawhin, discount siamte an ti thei tawh a, hei hian zu hralh a titamin, Delhi sorkar sum thawh chhuah pawh 27% laiin a tipung bawk a ni.

Mahse liquor policy hi BJP-in an dodal bakah, July 2022 khan Delhi chief secretary Naresh Kumar chuan zu zawrhna tura license pek danah induhsakna a awm thu a sawi. Covid-19 hri len laiin zu zawrh phalna license siamna atana pawisa dawn, Rs. vbc 144 chu pek let a nih thu a sawi bawk. Chief Secretary report behchhan hian Delhi Lt. Governor, VK Saxena chuan CBI te koin, chhui turin a hriattir a ni. Hemi hnu lawk hian Delhi sorkar hian liquor policy hi a hnukdawk a, zu dawr 400 zet khar a nih phah bawk. August 2022 khan CBI chuan liquor policy chungchang an chhuinaah Arvind Kejriwal leh Manish Sisodia te in an dap a, pawisa chheprelha rinhlelh an ni. ED te pawhin CBI hnu chhui hi pawisa a tel tawh avanga zawm vein 2023 March khan Manish Sisodia in hi an dap ve leh bawk.

Hetih lai hian AAP chuan ED chu sorkar laipuiin a tirh kual mai mai theiha awm a nih thu an sawi a, BJP sorkar chu Sanjay Singh chhuah zalen vat turin an phut. ED-te'n Singh an man chhan chu Parliament-a Adani group chungchang a sawi vang chauh a nih thu an sawi bawk. ED hian he thubuai kaihhnawihah hian AAP hruaitute in hi vawi tam tak dapin, thu zawh fiah an ni fo a, mahse, an eiruk nia sawi pawisa hi hmuh pawh an hmu chuang lo a, hei thil hi AAP sorkar beih tumna hmanrua mai a nih thu an sawi a ni.