Activists-te'n MGNREGA chhan nan BJP hneh a ṭul an ti

Activists leh kut hnathawktu intel khawm, NREGA Sangharsh Morcha chuan kum 2024 Lok Sabha inthlanpui lo awm turah MGNREGA a tawp mai loh nan BJP chu rorelna ṭhutthleng aṭanga paihthlak a ṭul thu an sawi.

NREGA Sangharsh Morcha hian nimin khan Delhi-ah press conference neiin,"Hlawh pek theih loh te, state-in hlawh hniam thei ber a siam aia hniama MGNREGA hnuaia inhlawhte hlawh a hniam zawk te, budget tihhniam zel leh hmanrua leh khawl ṭha zawk hmanga hnathawktu an titlem zel chuan MGNREGA hi a tihtawp phah mai dawn a ni," tiin an sawi. West Bengal, Paschim Banga Khet Mazdoor Samity-a mi, Anuradha Talwar chuan West Bengal-a MGNREGA tihtawp lailawk chu sorkar laipuiin he scheme tihtawp a tumna en chhinna a ni tiin, Bihar Jan Jagran Shakti Sanghathan-a mi, Ashish Ranjan chuan,"MNREGA hi kan kalpui reng duh a nih chuan he sorkar hi kan paihthlak a ngai a ni," tiin a sawi ve bawk.