MGNREGA hlawh pek loh chungchangah sorkar laipui insawi fiah

West Bengal-a MGNREGA hnuaia inhlawhte hlawh tur sorkar laipuiin a pek chhuah loh chungchangah Union Rural Development Ministry chu insawi fiahin, MGNREGA fund pek chhuah duh loh engmah an neih loh thu leh, West Bengal fund bik chu state sorkarin central sorkar ruahmanna a zawm loh avanga la pe chhuak lo mai an nih thu a sawi.

Rural Development Ministry chuan,"MGNREGA hnuaia West Bengal tana ruahman fund hi central-in tih tur a tihte a tih loh avangin March 9, 2022 aṭang khan, MGNREGA Act hnuaia section 27 hmangin tihtawp a ni," tiin, MGNREGA chu mamawhna avanga inhlawhna siam leh state leh UT te hnena sum pek chhuah rengna thil a nih avanga sorkar laipui pawhin sum a dah reng thu a sawi. "Hlawhte a hun taka pek a nih theih nan theihtawp kan chhuah a, State leh UT-te pawh a hun taka hlawh pe chhuak turin kan hrilh fo ṭhin. Financial year kal mekah, October 4 thlenga kan chhinchhiah dan chuan, ni 15 hmaa hlawh pek hi 99%-in kan kalpui" tiin an tarlang. "Hlawh pek tlai ṭhin chu state sorkar hnathawh muan avang te, sorkar laipui ruahmanna an zawm ṭhin loh avang te, Fund Transfer Order (FTO) leh chhan hrang hrang a awm a, hlawh pek tlai a nih chuan hlawh latu chuan MGNREGA hnuaia dan ding lai angin compensation a la thei a ni," an ti bawk.

West Bengal-ah hian MGNREGA hnuaia hlawh pek tur central-in state hnena a pek theih loh avangin Ningani khan Trinamool Congress chuan Kolkata-ah nawrh an huaihawt. Raj Bhavan thleng kawng an zawh a, pawisa pek chhuah phut hian October 3 leh 4 te khan Delhi-ah nawrh an lo huaihawt tawh bawk a ni.