Delhi boruak chhe zual zel; lungalhthei hman khap

Air Quality Index (AQI) chhinchhiah danin Inrinnia Delhi boruak dinhmun chu 214 niin boruak a chhe chho leh tawh hle. AQI tehnaa 0-50 hi boruak ṭha niin, 401-500 hi a chhe thei ber a ni.

Delhi boruak hi thlasik lai hian kum tinin a chhe zual ṭhin a, nikum tun ang hun aia kumina Delhi lum lam chu degree khata sangin, a vawh lam pawh kum dang aia vawt deuh niin Indian Meteorological Department (IMD) chuan an sawi.

AQI hian Delhi-a thuneitute chu hotel leh restaurant vela lungalhthei hmanna reng reng khaptir turin a hrilh tawh a, boruak chhe zel tur venna pakhat atan industry, boruak chhia siam nasa zual leh thermal power plant-te laka khirh leh zual turin a hriattir bawk.

Sorkar laipui hian thlasik laia Delhi boruak chhia venna leh siam ṭhatna kawnga hmalakna atan Graded Response Action Plan (GRAP) chu a kalpui reng tawh a, Commission for Air Quality Management (CAQM) chu GRAP hmanga hmalaknate kengkawhtu tura ruat an ni bawk. CAQM hian Delhi boruak hi Inrinni aṭang khan a chhe zual niin an sawi. CAQM thuchhuaha a lan danin,"Boruak chhe zel tur tiziaawm tur hian National Capital Region (NCR)-ah hian GRAP stage-1 hi kalpui nghal vat a ṭul a ni", tiin an tarlang.

CAQM hian GRAP hnuaiah hian hmalak dan tur ruahmanna felfai tak siamin stage hrang hrangah an ṭhen a; AQI 201-300 (Poor) a nihin stage 1 an kalpui a, AQI 301-400 (Very poor)- ah stage 2, AQI 401-450 (Severe)- ah stage 3 leh AQI 450 chung lam (Severe plus)-ah stage 4 angin an kalpui ṭhin a ni.