IAF-in an chhinchhiahna puanzar thar tlangzarh

Indian Air Force (IAF) chuan kum 91 an tlin lawmna pualin nimin khan Prayagraj-ah Air Force Day parade an nei a, he parade-ah hian Air Chief Marshal (ACM), Vivek Ram Chaudhari chuan IAF chhinchhiahna puanzar thar an tlangzarh nghal,

IAF chhinchhiahna puanzar thar an tlangzarhah hian a sir chung ding lamah IAF crest dah belh a ni. Kumin Air Force Day hi Prayagraj-a Air Force Station Bamrauli-ah hman a ni.

Air Force Day hmannaah hian IAF chuan bungraw phur tur aircraft, C-295 an lak luh thar chu an tlangzarh bawk a, kum 2025 aṭanga hman an tihtawp tur, MiG21 Bison pawh a tawp nan air show-ah lantir a ni bawk.

ACM Choudhari chuan,"Kan hmaa chona awmte chu paltlangin kan hneh a nih satliah lo a, chung chonate chu thil ṭhaah kan chhuah bawk a ni. Khawvel ram kalphung inher danglamah ram dang thil siama innghah ngai loin keimahni siam ngei kan hmang ve thei tawh a ni," tiin a sawi. Kumin Air Force Day-ah hian a hmasa ber atan hmeichhe officer, GP Capt. Shaliza Dhami chuan parade a kaihruai a, hmeichhe hlang contingent an awm ṭum khatna a ni bawk a ni.

IAF hi Royal Indian Air Force (RIAF) tih a nih ṭhin lai chuan an chhinchhiahna puanzarah a vei lam chungah British hnam puanzar a awm ṭhin a, RIAF chhinchhiahna (a sen, a var leh a pawla thai bial) dah a ni bawk. India-in zalenna a hmuh hnuah siam ṭhat niin British hnam puanzar aiah hian India hnam puanzar dah a ni a, Royal Air Force chhinchhiahna bial aiah IAF tricolour dah a ni ta bawk a ni. Tuna IAF chhinchhiahna puanzara IAF crest dah hian IAF nihna a pho chhuak chiang leh zual dawn a ni, an ti.