Rajasthan sorkarin caste survey nei dawn

Rajasthan sorkar chuan Inrinni khan an state chhunga caste survey neih a nih tur thu puangin, survey neihna tur thupek hi a tichhuak nghal bawk. Survey neihna senso hi state sorkar tum tur a ni dawn a, mipuite khawtlanga an dinhmun, ei leh bara an dinhmun leh zirnaa an dinhmunte zir chian a ni dawn a ni.

Caste survey neih tur hi state cabinet-in a pawm hnuah Department of Social Justice and Empowerment chuan puangin, Department of Planning (Economic and Statistics) chu hma la tura ruat an ni tih an tarlang. Survey neih hun tur erawh tarlan tel a la ni lo.

Rajasthan-in caste survey neih a tum hma hian Bihar chuan caste survey a neih aṭanga an state chhunga mihring dinhmun a hmuh chhuahte a lo puangzar tawh a ni. Caste survey hi Rajasthan hian a nei a nih chuan India-a caste survey nei state pahnihna tur a ni ang.

Rajasthan hi Congress party rorelna sorkar hnuaia awm a ni a, Bihar-a rorel laite nen hian INDIA kaltlangin an thawkho a ni. INDIA hian caste survey neih hi an tum ber pakhat a ni a, hei hi inthlanpui atana an campaign puitu tur niin an ngai. Bihar hian an state-a caste survey an neihna data chu October 2, Mahatma Gandhi pian chamah khan a lo tlangzarh tawh a, Bihar caste survey aṭanga a lan dan chuan Bihar-ah hian Other Backward Classes (OBCs) leh Extremely Backward Classes (EBCs) te chu Bihar mipui zawng zawng aṭanga 63% lai an tling.