ECI-in state 5-a inthlan hun tur a puang

10th October, 2023

Election Commission of India (ECI) chuan nimin khan state panga, Mizoram, Madhya Pradesh, Chhattisgarh, Rajasthan leh Telangana-a assembly inthlan neih hun tur a puang.

Inthlang hmasa ber tur hi Mizoram niin November 7-ah neih a ni dawn a, Madhya Pradesh-in dawtin November 17-ah an inthlang ang. Rajasthan inthlan hun tur hi November 23 a ni a, Telangana hi November 30-ah an inthlang ve thung dawn a ni. Inthlang tur zingah hian Chhattisgarh chauh hi phase 1 aia tama inthlang tur an ni a, Chhattisgarh inthlan hi phase 2-ah neih tur niin, phase 1 hi November 7 leh phase 2 hi November 17-ah a neih a ni ang. State pangaa inthlan result hi December 3-ah puan a ni dawn tih EC chuan a sawi.

Kumina state pangaa inthlanna tur atan hian Assembly Constituency 679-ah polling station nuai 1.77 siam a ni dawn a, polling station nuai 1 vel chu live-a hmuh theih tura duan an ni dawn. ECI chuan state panga aṭang hian vote vbc 16.1 chuang a tlak an beisei thu an sawi bawk.

Rajasthan

Rajasthan hi November 23-ah an inthlang dawn a, inthlan neih tur chungchanga Gazette notification chu October 30-ah tihchhuah a ni ang. Inthlan chuh tumte tan November 6 thleng nomination paper theh luh theih a ni ang a, nomination lutte hi November 7-ah endikin November 9 thleng inhnuhdawh theih a ni ang. November 23-ah vote an thlak dawn a, December 3-ah vote chhiar a ni ang a, December 5 hmain zawh fel vek tur a ni.

Rajasthan-ah hian MLA seat 200 awmin kum 2018 inthlanah khan sorkar siam tura seat lak ngai zat 101-ah Ashok Ghelot kaihhruai Congress chuan seat 100 an la a, independent MLA leh Bahujan Samaj Party (BSP) te nen thawkhoin sorkarna an siam a ni.

Madhya Pradesh

Madhya Pradesh inthlan tur chungchanga gazette notification hi October 21-ah chhuah tura tih a ni a, nomination paper hi October 21 thleng theh luh theih a ni ang. October 31-ah nomination te hi endikin, inhnuhdawhna hun hi November 2 thleng hawn a ni bawk. November 17-ah inthlangin December 3-ah vote chhiar a ni anga, December 5 ral hmain zawh fel vek tur a ni.

Madhya Pradesh hian MLA seat 230 neiin, chief minister Shivraj Singh Chouhan kaihhruai BJP-in sorkarna an siam mek a, kumin inthlanah hian AAP pawhin chuh ve an tum thu an sawi. Kum 2018 inthlanah khan BJP hian seat 116 lak ngaiah seat 109 an la a, Congress-in seat 114 lain sorkarna siam mah se, 2020 March khan Congress MLA 22 zetin an party hi an chhuahsan a, hei vang hian majority neih ngai zat seat 104 a lo nih tak avangin seat 106 nei BJP chuan floor test paltlangin sorkarna an siam chhunzawm ta a ni.

Kar hmasa chuan Madhya Pradesh Election Commission chuan an state-a voter dinhmun tar chhuakin, electoral roll thar berah voter 56,136,229 an awm a, heng zinga 28,825,607 hi mipa niin, hmeichhia hi 27,233,945 an awm bawk.

Telangana

Telangana-ah hian seat 119 awmin, sorkarna siam tura seat lak ngai hi seat 60 a ni a, kum 2018 inthlanah khan chief minister Chandrashekhar Rao kaihhruai, Bharat Rashtra Samithi (BRS) chuan seat 88 lain sorkarna an siam a ni.

Inthlan chungchanga thuchhuah hi November 3-ah puan tur a ni a, nomination paper theh luh theih hun hnuhnung atan November 10 ruat a ni. Candidate-te hi November 15 thleng an inhnukdawk thei ang. November 30-ah vote an thlak dawn a, December 3-ah vote chhiarin December 5 hmaa inthlan kaihhnawih thilte zo fel tura ruahman a ni. Kumin inthlan hi rorel lai BRS bakah BJP leh Congress-te inkara rorelna inchuhna a ni dawn a, Telangana-ah hian voter vbc 16 dawn awmin, heng zinga vbc 8.2 hi mipa niin, vbc 7.8 hi hmeichhia an ni.

Chhattisgarh

Chhattisgarh hi phase hniha inthlang tur an ni a, phase 1 hi November 7-ah neih a ni ang a, phase 2 hi November 17-ah neih a ni thung ang.

Phase 1-ah hian Assembly Constituency 20-ah vote thlakin, phase 2 hian Assembly Constituecy 70 a huam thung dawn a ni. Gazette notification hi October 13 leh October 21-ahte chhuah a ni anga, nomination hi October 20 leh 30 thleng siam theih a ni bawk ang. Candidate inhnukdawk duh tan October 23 leh November 3 thleng hun hawn a ni a. Vote hi December 3-ah chhiar vek tur niin, December 5 hmaa zawh fel vek tur a ni bawk. Chhattisgarh-ah hian MLA seat 90 a awm a, sorkarna siam tur hian seat 46 lak a ngai. Inthlan hnuhnung berah khan Bhupesh Baghel kaihhruai Congress-in seat 68 lain sorkarna an siam a ni.