SKM-in FIR theh luha loneitute chungchang sawina an dem

Loneitu pawl, Samyukt Kisan Morcha (SKM) chuan kum 2020-a loneitute nawrhna kaihhnawiha Delhi police-te'n online news portal, NewsClick leh an journalist-te laka thubuai an theh luha loneitute nawrh huaihawt chungchang an sawi dan chu an dem thu an sawi.

Delhi police-te FIR theh luhah hian, "Loneitute chu vantlang thil tihchhiat tum leh India sum leh pai dinhmun tichhe tura nuar, ram chhunga buaina siam leh thil dang bakah, ram pawn aṭanga dan kalha pawisa hmu an ni" tihin ziah a ni. Hei hi thu dik lo leh uchuak tak a nih thu SKM chuan an tarlang.

SMK chuan BJP sorkar hnuaia loneitute nek chep zawnga dan leh kalphung thar siam an tum dodala nawrh an buatsaih lai khan eng bungrua mah an tichhe lo a, eng supply mah an dang chat hek lo tiin an sawi. "India ram sum leh pai dinhmunin a tawrh phah kan hre lo a, dan kalha chein emaw, buaina siamin kan che lo. Tharum leh tihluihna hrang hrang hmanga ṭha tak leh dan phal ang thlapa loneitute nuar hnawh darh tuma sorkar laipui chetna zawk khan ram leh loneitute tan harsatna a siam zawk a ni," tiin, nawrh huaihawt a nih lai khan hmun hrang hrangah lo neitu mi 735 an thih thu leh, Lakhimpur Kheri incident-ah phei chuan loneitu pali leh journalist pakhat thah an nih thu an sawi bawk.

China aṭanga fund hmu chu Prime Minister Narendra Modi a nih thu leh PM Cares Fund leh Gautam Adani sumdawnna kaltlanga a dawn thu SMK thuchhuah chuan a tarlang. NewsClick journalist laka FIR theh luha loneitute an puhna chu loneitute nawrhna hlawhtlinnna leh an inpekna ngaihnepna a ni tiin, loneitute bei zawnga hmalakna awm leh chu an duh lohzia lantir nan rampum huapa nawrh buatsaih leh an tum thu an sawi a ni.