CWC-in Israel leh Hamas-te inkahhai puang thuai turin duh

Congress Working Committee (CWC) chuan October 9 khan meeting neiin, Palestinian mipuite'n ram leh inrelbawlna hran nei tur leh, an zahawmna hum tura an beihna chu an thlawp thu sawiin, indona erawh titawp vat se an duh thu an sawi.

Congress rorelna sang ber, CWC chuan an meeting-ah hian resolution pass-in, Middle East-a indo chhuak chu pawi an tih thu leh, ni hnih chhung leka mi sang chuangin nunna an chan chu lungchhiatthlak an tih thu an sawi.

CWC hian Palestinian te beihna hi a lo thlawp reng tawh ṭhin a, mahse, tuna inbeihna chhuak leh mek chu tawp vat se, indote inkara inhriatthiam lohna leh harsatna chu ṭawngkama chin fel ni se an duh thu an sawi. CWC-a resolution siam a nih hma hian Congress chuan Israel-in beih a tawk leh mipui chunga tharum thawhna a thleng chu an dem thu an lo sawi tawh a ni.

Congress general secretary, Jairam Ramesh chuan an party-in Palestinian mipuite'n inzah tawnna, intluk tlanna leh an zahawmna atana an beihna leh beiseinate chu inbiak remna hmanga chin fel a ṭul thu leh, chu inbiakna chuan Israel duhdan a zawm ve tho a ṭul thu a tarlang bawk.