I&B Ministry-in FM radio kaltlanga fakna siam man ennawn

Information and Broadcasting (I&B) Ministry chuan an hnuaia Rate Structure Committee rawtna angin, private FM radio station-a sorkar policy leh hmalakna fakna siam man a ennawn a, kum sarih lai an lo hman tawh rate chu an tihdanglam thu an puang.

I&B Ministry chuan,"Private FM radio te tana dan inrualkhai hman kan tumna chu he fakna siam man kan duan thar aṭang hian a hlawhtling thei dawn a ni," tiin, September thlaa an lo pawm tawh, December 2015 leh March 2023 chhunga pawisa hlutna danglam aṭanga chhuta, fakna siamna man hrim hrim chu 43%-a an tihpun thu an sawi.

FM radio station-a fakna siam manah hian second 10 zelah Rs. 74 a ni tawh dawn a, a hma chuan Rs. 52 a ni ṭhin. Ministry chuan,"Fakna siamna man tihsan chu ram chhunga radio station-a kawng hrang hranga thawktu, community 400 chuang tan hlawkna a ni dawn a ni," tiin, pawisa hlutna leh market mila siam an nih thu an sawi.

Ministry hian fakna siam man a tihsan rual hian khawpui azira a man chhutna kalhmang erawh a ngai anga kalpui a la ni dawn thung. Hei hian khawpuia mihring tam lam leh Indian Readership Survey (IRS), 2019 aṭanga radio ngaithlatute data te a huam a, heng aṭang hian radio station-te chuan ngaithlatu an neih tam dan zelin an station kaltlanga fakna siam man pawh a tidanglam thei dawn a ni.