IMF-in India GDP ṭhanna tura beisei zat tisang

International Monetary Fund (IMF) chuan khawvel puma sum leh pai dinhmun chu Covid-19 hripui len hnuah pawh a la chhe lutuk lo niin an sawi. 2023 atan India GDP ṭhanna tur pawh 6.3%-ah a pun chho a ni.

Morrocco-a meeting an neih mekah, IMF chuan khawvel pum economy ṭhanna chu Russia-Ukraine indona leh Israel-Hamas indona avangtein hniam deuh dawn mah se India chu ram ṭhang mekte zinga sang ber tura beisei a nih thu an sawi. IMF hian tun fiscal year atana India GDP ṭhanna tur chu 6.1 aṭangin 5.9-ah a lo tihniam tawh a, tunah hian 6.3-ah a dah chho leh ta a ni.

IMF hian khawvelin harsatna chi hrang hrang a paltlang mek leh, beisei a san loh laia sum leh pai dinhmun chhe lutuk loa kan awm thei chu thil ṭha lam a nih thu an sawi. Hmanni maia an tihchhuah, World Economic Forum report-ah erawh khawvel puma ram hrang hrangte ṭhanna chu a rualkhai loh thu leh hma a sawn chak loh thu an sawi. IMF hian khawvel pum sum leh pai dinhmun ṭhanna tur chu kumin atan 3% an beisei a, 2024-ah chuan kumin aia hniam 2.9%-a ṭhan an beisei thung.