CBI-in RLDA fund tichingpentu mi 5 man

Central Bureau of Investigation (CBI) chuan Rail Land Development Authority (RLDA) fund, Rs. vbc 31.50 tichingpena puh mi panga an man a, an zingah hian RLDA official ni ṭhin mi pahnih leh Bank of Baroda-a thawk hluite an tel.

CBI-in an mante hi RLDA manager hlui Vivek Kumar, Delhi Vishwas Nagar-a Bank of Baroda branch head hlui Gopal Thakur, Hitesh Karelia leh Nilesh Bhatt te an ni. CBI-te sawi dan chuan RLDA hian Bank of Baroda hnenah fixed deposit hmangin kum khat chhung atan Rs. vbc 35 an dah a, hemi hnu hian pawisa dah aṭanga a pung awm chu thla thum chhung dah chhunzawm leh turin inrem siamna an nei. Hetih lai hian bank hian fixed deposit-ah hian Rs. vbc 3.5 chauh an dah lut a, pawisa dah luh bangte chu mimal bakah RLDA leh bank official-te thurualpui, shell company hnenahte an dah a ni. Bank-a dah tura ruahman pawisate hi Mumbai-a shell company-te hnenah a kal ta zawk a, hengte hi lak chhuah leh niin, pawisa tichingpentua puhte hian pawisate hi la chhuakin an hmang ral nia hriat a ni.

"RLDA official-te inrawlhna pawh hmuh chhuah zel a ni a, he thil kaihhnawihah hian Delhi, Mumbai, Goa, leh Himachal Pradesh-ah te hmun eng emaw zat kan lo dap tawh a ni. Pawisa dah pun aṭanga Rs. vbc 3.5 chauh fixed deposit-a dah chhunzawm leh a nih hian RLDA tan channa nasa tak a ni," tiin CBI thuchhuahah chuan an tarlang.