Covid-19 kai enkawl dam 70% tling tawh

India ram hmun hrang hrangah Covid-19 kai tawh enkawl dam an pung zel a, nimin thleng khan mi 16,39,599 chu dam tawhin hei hi 70% a tling tawh a ni.

Ministry of Health and Family Welfare-in nimina report an tihchhuahah hri kai hmuh chhuah thar 60,963 lai an awm leh a, hei nen hian ramchhung hmun hrang hrangah hri kai 23,29,638 an awm tawh. Hetiang zat hian hri kai tawh mah se enkawl dam pawh an pung chak hle a, nimina report-ah pawh hian mi 56,110 chu dama puan an ni leh a, hei nen hian 16,39,599 lai chu an dam tawh a, 6,43,948 chuan hri an la kai mek thung.

Mi 834-in an thihpui leh avangin hri vanga thi 46,091 an awm tawh bawk. Maharashtra chu hri kai tam ber state an la nih chhunzawm zel a, Tamil Nadu chuan dawtin Andhra Pradesh chu pathumna an ni a, Karnataka, Delhi, Uttar Pradesh leh West Bengal-te chuan an dawt ve bawk a ni.

Indian Council of Medical Research (ICMR) chuan nimina report an tihchhuahah darkar 24 chhungin sample 7,33,449 an endik tih an tarlang a, nimin thleng khan sample 2,60,15,297 an test tawh a ni.

Laboratory pawmpui 1421 an nei tawh a, 944 chu sor­kar laboratory niin 477 chu private laboratory a ni bawk.

WHO data aṭanga a lan dan chuan ni sarih liam ta chhung khan ni khata India rama case hmuh chhuah thar zat chu US leh Brazil aiin a tam zel tawh. India ramah hian khawvel puma hri kai zawng zawng zinga 23% lai a awm nia tarlan niin, thihpui zinga 15% hi India rama mi a ni bawk.