Covid-19 vaccine thlan dan tur ngaihtuah

India-a national expert committee chu nimin khan Covid-19 vaccine thlan dan tur ngaihtuahin an ṭhukhawm. 

Meeting hi Niti Aayog member Dr V K Paul chuan a kaihruai a, meeting-ah hian vaccine thlan turte ngaihtuah ho a ni a, vaccine siamchhuah a nih huna a hman dan turte, tute nge hmang hmasa ber ang tih te leh engtin nge vaccine chu mipuia sem darh dan tur tihte chu an thu ngaihtuah ho a nih thu health secretary Rajesh Bhushan chuan a sawi.  

Ram chhungah vaccine pathum chu clinical trial neih pui mek a ni a, Bharat Biotech leh Cadila Healthcare siam vaccine chuan clinical trial phase 1 leh 2 an nei mek a, Pune-a Serum Institute-ah Oxford University vaccine chuan clinical trial phase 3 neih pui mek a ni bawk.   

Russia chuan Thawhlehni khan thla hnih chhung mihringa enchhin a nih hnuah Covid-19 vaccine hmasa ber tur chu Russia sorkarin a pawm thu a puang a, Russia president Vladimir Putin fanu pawhin vaccine hi a la  nghal bawk a ni. 

Indian Council of Medical Research (ICMR) chuan July 2 khan Covid-19 vaccine, COVAXIN chu August 15-ah mipuite hman theih tura peih fel hman tum turin Bharat Biotech a hriattir a, India-ah hri kai an tam tak zel avang leh Russia-in Covid-19 vaccine an peih tawh thu an sawi avangin India hi a hmanhmawh chho hle niin a lang.